काठमाडौं – राष्ट्रिय स्वतन्त्र पार्टीकी सांसद सोबिता गौतमले गृहमन्त्री रमेश लेखकको राजीनामा माग गर्दै सरकारको कार्यशैलीमाथि कडा आलोचना गरेकी छन्। मंगलबार संसद भवन बाहिर सञ्चारकर्मीहरूसँग कुरा गर्दै उनले चैत १५ गतेको प्रदर्शनमा सरकारले प्रभावकारी सुरक्षा व्यवस्थापन गर्न नसकेको आरोप लगाइन्।
उनका अनुसार प्रशासनको लापरबाहीकै कारण प्रदर्शन हिंसात्मक बन्दै गयो र अन्ततः कीर्तिपुरका सविन महर्जनको ज्यान गयो। गौतमले भनिन्, “गृहमन्त्रीले आफ्नो जिम्मेवारी पूरा गर्न सकेनन्। अब उहाँले मार्ग प्रशस्त गर्नुपर्छ। सरकार असफल भइसकेको छ, नेतृत्व फेरबदलको समय आइसक्यो।”
सरकारको भनाइ र वास्तविकता बाझियो
सांसद गौतमले सरकारले घटनाबारे दिएको विवरण र बाहिर आएका भिडियो फुटेजबीच ठुलो अन्तर रहेको बताइन्। सुरक्षाकर्मीले चलाएको गोलीबाट महर्जनको मृत्यु भएको पुष्टि भए पनि सरकार सुरुदेखि नै वास्तविकता लुकाउने प्रयासमा रहेको उनले आरोप लगाइन्।
“सरकारले दुईतर्फी झडपका कारण गोली चलेको दाबी गर्यो, तर सार्वजनिक भएका फुटेजहरूले फरक वास्तविकता देखाएका छन्। यो सरकारको असफलता र गलत सूचना प्रवाह गर्ने प्रवृत्तिको प्रमाण हो,” उनले भनिन्।
प्रशासनको भूमिकामाथि प्रश्न
गौतमले प्रशासनको भूमिकामाथि पनि गम्भीर प्रश्न उठाउँदै भनिन्, “जहाँ सरकार र प्रशासनको उपस्थिति हुनुपर्ने थियो, त्यहाँ उनीहरू चुके। यो लापरबाहीको मूल्य निर्दोष नागरिकले चुकाउनुपर्यो।”
उनले निष्पक्ष छानबिन गरी दोषीमाथि कारबाही गर्नुपर्ने माग राख्दै सरकारलाई जिम्मेवार बन्न चेतावनी दिइन्। “यदि सरकार जनताको सुरक्षाप्रति गम्भीर छैन भने, नेतृत्वमा बस्नेहरूको स्थान सुरक्षित रहँदैन।”
सांसद गौतमको यो आक्रोश केवल गृहमन्त्री लेखकप्रति मात्र सीमित छैन, उनी समग्र सरकारको कार्यशैलीमाथि नै प्रश्न उठाउँदै सरकारको असफलताको चित्रण गरिरहेकी छन्। अब सरकारको आगामी कदम के हुने हो, त्यो हेर्न बाँकी छ।
